Трамп: коронавирус хатоест, ки нохудогоҳ аз ҳадди назорат баромадааст ва ё огоҳона содир шудааст

Трамп: коронавирус хатоест, ки нохудогоҳ аз ҳадди назорат баромадааст ва ё огоҳона содир шудааст
  • Post category:Ҷаҳон


Агар маълум шавад, ки Пекин «дидаю дониста» маълумоти марбут ба коронавирусро пинҳон кардааст, Чин «ба ҷавобгарӣ кашида мешавад».
Доналд Трамп, президенти ИМА ин нуктаро зимни як брифинг дар Кохи Сафед изҳор карда гуфт,  чизҳои аҷиб рух дода истодаанд, аммо дар ин самт тадқиқотҳои зиёде идома дорад ва мо инро хоҳем фаҳмид.
Раҳбари Амрико таъкид кард, ки ин вируси хатарнокро пеш аз пандемия дар Чин метавонист қатъ кард, аммо ҳоло тамоми ҷаҳон аз он дар азоб аст.
«Ҳамааш аз он вобаста аст, ки оё ин ҳодисаи коронавирус хатоест, ки нохудогоҳ аз ҳадди назорат баромадааст ва ё огоҳона содир шудааст»,-гуфт Трамп.
Аммо раисиҷумҳури Амрико мушаххас нагуфт, ки агар дар ҳоле гуфтаҳояш тасдиқ шаванд Пекинро чи интизор хоҳад буд.
Трамп ҳамчунин омори фавтидагон аз коронавирус дар Чинро шубҳаовар хонда гуфтааст, дар он кишвар бештар аз ИМА, ки ҳоло маркази авҷи ин вирус аст, беморон даргузаштаанд.
Бар пояи оморҳои ахир шумори фавтидагон аз ин беморӣ дар Чин 4632 нафар ва дар ИМА наздики 40 ҳазор мерасад, ки дар ҷаҳон нахустин аст.
Қаблан шабакаи телевизионии Fox News бо такя ба як манбаи баландпояаш иттилоъ дода буд, ки коронавирус дар Чин на аз як фурӯшандаи бозор, балки аз як корманди лабораторияи Институти вирусшиносие дар Ухани Чин баромадааст. Аммо мақомоти Чин ин иддаоро рад мекунанд.
Ёдовар мешавем, ки қаблан барандаи Ҷоизаи Нобели аз Фаронса низ гуфт, ки коронавирусро ба таври сунъӣ сохтан мумкин аст.
Бар пояи оморҳои ахир шумори гирифторони коронавирус дар ИМА ба 740 ҳазору 746 нафар ва дар Чин бошад ба 82 ҳазору 735 нафар мерасад.

Мо дар шабакаҳои иҷтимоӣ