Дар Қандаҳор 53 ҷангҷӯи ҳаракати «Толибон» кушта шуданд

Дар ҷануби Афғонистон дар вилояти Қандаҳор, 53 ҷангҷӯи ҳаракати «Толибон» кушта шуданд, гуфта шудааст дар гузориши вазорати мудофиаи ин кишвар, хабар медиҳад вебсайти «Афғонистон.ру.»
Тибқи гузориши вазорати дифоъ, 15 толиби дигар маҷрӯҳ шудаанд. Амалёти ҷангӣ дар ноҳияҳои Арғандоб ва Ҳакрез сурат гирифт, ки Толибон ният доштанд ба мавқеъҳои низомиёни афғон ҳамла кунанд. Ҳангоми ҳамлаи нерӯҳои афғон ҷангиёни «Толибон» талафоти ҷиддӣ доданд. Ғайр аз ин, як анбори калон бо дастгоҳҳои таркандаи худсохт хароб карда шуд. Дар бораи талафот дар сафҳои нерӯҳои Афғонистон гузориш нашудааст.
Вазорати мудофиа инчунин аз пешгирии ҳамлаи «Толибон» дар Урузгон хабар дод. Тавре ки дар ин паём қайд карда шуд, низомиён тавонистанд саривақт як мошини бо маводи тарканда муҷҷаҳазро, ки «Толибон» мехостанд барои ҳамла ба нерӯҳои ҳукуматӣ истифода кунанд, безарар гардонанд.

Мо дар шабакаҳои иҷтимоӣ