Ovozi.uz

Эҳтиром ба соҳибқаламе, ки дар қалбаш Ватан ва дар қаламаш нур дорад

Дар Хонаи матбуоти вилоят бахшида ба фаъолияти эҷодии шоира ва олима, узви Иттиҳодҳои журналистон ва Иттифоқи нависандагони Ӯзбекистон, профессори Донишгоҳи давлатии Самарқанд Ҷумагул Сувонова таҳти унвони «Дили ман шукуфта ба ранги арғавон» маҳфили адабӣ баргузор гардид.
Дар оғози чорабинӣ ҷонишини ҳокими вилоят Р. Қобилов табрикоти ҳокими вилояти Самарқанд Адиз Бобоевро қироат намуд. Дар табрикнома саҳми арзандаи Ҷумагул Сувонова дар рушди илму адаб ва журналистика, фаъолияти самарабахши чандинсола ва хизматҳои ӯ дар тарбияи насли наврас баланд арзёбӣ гардиданд. Ҳамчунин, ба эҷодкор туҳфаҳои хотиравии ҳокимияти вилоят тақдим карда шуданд.
Иштирокдорони маҳфил доир ба фаъолияти эҷодӣ ва илмии Ҷумагул Сувонова, саҳми ӯ дар рушди адабиёти ӯзбек ва журналистикаи миллӣ, инчунин роҳи ибратбахши зиндагии ӯ андешаҳои худро баён намуданд. Асарҳои ӯ, ки ғояҳои ватандӯстӣ, қадру манзалати инсон, некиву меҳрубониро тараннум мекунанд, махсусан мавриди таваҷҷуҳ қарор гирифтанд.
Шоири халқии Ӯзбекистон Хосият Бобомуродова, зимни суханронӣ дар бораи зиндагӣ ва фаъолияти эҷодии Ҷумагул Сувонова, меҳнатдӯстӣ, матонат ва сабру таҳаммули ӯро махсус таъкид кард.
— Ҷумагул аз ноҳия ба маркази вилоят омада, бо истеъдод, хоксорӣ ва меҳнатдӯстии худ тамоми мушкилоти зиндагиро паси сар кард, — гуфт Хосият Бобомуродова. — Ӯ як писар ва як духтарро ҳамчун фарзандони арзандаи Ватан ва ҷомеа тарбия намуд. Ҳамзамон, эҷод ва илмро дар як вақт пеш бурд. Ман ӯро солҳои зиёд мешиносам. Ҳар як озмоиши зиндагӣ ӯро боз ҳам обутоб дода, қаламашро сайқал бахшид. Ӯ ҳеҷ гоҳ роҳи осонро интихоб накардааст. Ба ҳамаи дастовардҳояш бо меҳнат, сабру тоқат ва ташнагии дониш ноил гардидааст. То имрӯз қариб сӣ маҷмӯаи шеърӣ ва насрӣ, дастурҳои таълимӣ ва китобҳои дарсӣ таълиф намудааст. Дар ашъори ӯ эҳсосоти нозуки қалби зан, меҳри модар, муҳаббат ба Ватан, қадри инсон ва ҳақиқати зиндагӣ самимона инъикос ёфтаанд ва маҳз ба ҳамин сабаб хонандагон эҷодиёти ӯро ҳамеша бо самимият истиқбол мекунанд.
Маҳфили адабӣ бо мушоараи гарму самимӣ идома ёфт.