Ovozi.uz

Мулоқоти кушод бо донишҷӯён: масъалаҳои муҳими ҷавонон ва муаммои онҳо

Дар Донишгоҳи давлатии техникаи Самарқанд мулоқоти ҷавонон бо муҳаррири рӯзномаи вилоятии «Овози Самарқанд», вакили Шӯрои намояндагони халқи шаҳри Самарқанд Баходур Раҳмонов баргузор гардид.

Мулоқот дар шакли муколамаи ошкоро сурат гирифта, дар ҷараёни он донишҷӯён имкон пайдо карданд, ки масъалаҳои мавриди нигаронии худро баён намуда, дар бораи мушкилоти мавҷуда ва пешниҳодҳои худ сухан гӯянд. Муҳаррир ба андешаҳои ҷавонон таваҷҷуҳ зоҳир карда, барои озодона муҳокима намудани масъалаҳои мубрами рӯз ба онҳо шароит фароҳам овард. Донишҷӯён ба фаъолияти рӯзноманигорӣ таваҷҷуҳи хос зоҳир намуданд. Онҳо дар бораи хусусиятҳои касби рӯзноманигор, имкониятҳои ҳамкорӣ бо ҳайати таҳририяи рӯзнома, нашри мақолаҳои худ, инчунин мавзӯъҳое, ки имрӯз дар саҳифаҳои рӯзнома бештар муҳим ва талабот доранд, саволҳо доданд.

Дар баробари масъалаҳои рушди касбӣ, ҷавонон инчунин мушкилоти рӯзмарраи худро ба миён гузоштанд. Аз ҷумла, онҳо аз фаъолияти номуназзами нақлиёти ҷамъиятӣ изҳори нигаронӣ карданд. Ба гуфтаи донишҷӯён, интизории автобуси хатсайри № 7 вақти зиёдро мегирад ва автобус аксар вақт аз ҳад зиёд пур аз мусофирон меояд. Дар натиҷа, донишҷӯён ҳангоми ба донишгоҳ рафтан ба мушкилот рӯ ба рӯ шуда, эҳтимоли дер мондан ба дарсҳо зиёд мегардад.

Чунин мулоқотҳо ба таҳкими муколамаи байни ҷавонон ва намояндагони ҷомеа мусоидат намуда, барои муайян кардани мушкилоти мубрами донишҷӯён ва ҷалби таваҷҷуҳ ба масъалаҳои ҳалли амалиро тақозокунанда замина фароҳам меоранд.