Ба сабаби паст шудани ҳарорати ҳаво ба фаъолияти нуқтаҳои сӯзишвории метан маҳдудияти муваққатӣ ҷорӣ карда шуд. Дар ин бора Хизмати матбуоти Вазорати энергетика хабар дод.
Гуфта мешавад, ки аз сабаби якбора паст шудани ҳарорати ҳаво талабот ба гази табиӣ зиёд гардида, дар натиҷа дар баъзе минтақаҳо паст шудани фишори газ дар қубурҳо ба мушоҳида мерасад.
Таъмини хонаҳои истиқоматии аҳолӣ, муассисаҳои тиббӣ ва таълимӣ бо гази табиӣ ҳамчун вазифаи аввалиндараҷа муайян гардидааст. Аз ин рӯ, ба фаъолияти нуқтаҳои компрессории сӯзишвории газ барои автомобилҳо — нуқтаҳои сӯзишвории метан маҳдудияти муваққатӣ ҷорӣ карда шуд.
Ин чорабинӣ танҳо барои рӯзҳои сард ҷиҳати таъмини устувори аҳолӣ бо газ равона гардида, баробари ба меъёр омадани вазъият маҳдудиятҳо бекор карда мешаванд. Вобаста ба вазъи минтақаҳо маълумоти иловагӣ пешниҳод хоҳад шуд.
Инчунин, бо мақсади қонеъ гардондани ниёзҳои аҳолӣ, таъминоти газ ба нақлиёти ҷамъиятӣ ва воситаҳои нақлиёте, ки ба соҳаҳои иҷтимоӣ хизмат мерасонанд, бидуни маҳдудият ва ба таври устувор таъмин карда мешавад. Фаъолияти мунтазами ин гуна нақлиёт дар нигоҳ доштани сифати хизматрасонӣ ба аҳолӣ аҳамияти муҳим дорад.
