Дар Ӯзбекистон аз 4 то 28-уми феврал марҳилаи дуюми бақайдгирии аҳолӣ ва хоҷагии қишлоқ баргузор мешавад. Тибқи натиҷаҳои марҳилаи аввал, зиёда аз 30 миллион шаҳрванд ба таври онлайн аз бақайдгирӣ гузаштанд.
Дар доираи марҳилаи дуюм намояндагони маҳаллаҳо хона ба хона рафта, маълумотҳоро бо истифода аз таҷҳизоти планшетӣ ба низоми электронӣ ворид мекунанд.
Зарурати баргузории ин марҳила бо он вобаста аст, ки қисми шаҳрвандон дар бақайдгирии онлайн иштирок накардаанд ё ҳангоми пур кардани анкетаҳо хато анҷом додаанд.
Дар ин маъракаи бақайдгирӣ зиёда аз 55 ҳазор кормандони махсус омодашуда ҷалб шудаанд. Ҳар як намояндаи маҳалла дорои нишони хизматӣ бо рамзи QR мебошад, ки имкони санҷидани шахсият ва аслияти ҳуҷҷатҳоро фароҳам меорад.
Дар ҳолати ба миён омадани саволҳо, шаҳрвандон метавонанд ба маркази Call бо рақами кӯтоҳи 1851 муроҷиат намоянд.
Зикр мегардад, ки ҳамаи маълумоти шахсӣ боэътимод ҳифз карда мешаванд ва танҳо барои мақсадҳои оморӣ истифода бурда мешаванд.
