Ovozi.uz

«Дафтари фронти ҷавонон» чӣ гуна лоиҳа мебошад?

Дар Хонаи матбуот бо иштироки масъулони Садорати кор бо ҷавонони вилоят дар мавзӯи «Аз мулоқоти Президент то амалиёт: имкониятҳои нав барои ҷавонони Самарқанд» ва «Лоиҳаҳои мавҷуда» анҷумани матбуотӣ баргузор гардид.

Дар он роҷеъ ба 32 ташаббусе, ки Сарвари давлатамон дар мулоқот бо ҷавонон пеш гузоштанд ва ҷараёнҳои дар амал татбиқ намудани онҳо, корҳое, ки садорат дар соли 2025 амалӣ намудааст ва лоиҳаҳои барои соли 2026 пешбинишуда маълумот дода шуд.

— Дар соли 2026 нақшаҳои бузурге барои ташкили пурмазмуни фароғати ҷавонон муайян шудаанд, — иброз дошт сарвари Садорати кор бо ҷавонон Дилфуза Азизова. — Аз ҷумла, ҷалби 1,3 миллион ҷавон ба «Олимпиадаи панҷ ташаббус» ва ба даст овардани натиҷаҳои баланд дар марҳилаи ҷумҳуриявӣ ба нақша гирифта шудааст. Дар моҳи апрел барои баланд бардоштани рӯҳияи ҷавонон фестивали китобхонӣ баргузор мешавад. Намоиши филмҳо, барномаҳои консертӣ ва чорабиниҳои маънавӣ-маърифатӣ дар 176 муассисаи фароғатӣ, боғҳои фарҳангӣ ва фароғатӣ, инчунин марказҳои ҷавонони минтақа ташкил карда мешаванд, ки беш аз 860 ҳазор ҷавононро фаро хоҳанд гирифт.

Зикр гардид, ки 3512 ҷавоне, ки тарбияи душвор ва ба ҷинояткорӣ майл доранд, ба ташкилотҳои масъули минтақа таъин карда шудаанд ва бо онҳо низоми кори инфиродӣ таъсис дода шудааст. Дар натиҷаи корҳои анҷомдодашуда, 930 ҷавон шифо ёфтаанд, 210 ҷавон ба ҷойҳои кории доимӣ ҷойгир ва 101 ҷавон дар соҳаи технологияҳои иттилоотӣ, касбҳои муосир ва забонҳои хориҷӣ омӯзонида шудаанд.

— Дар минтақа дар соҳаи таълими забонҳои хориҷӣ 340 маркази омӯзишӣ фаъолият мекунанд, — идома дод Д.Азизова. — Ҳоло 32 856 нафар ҷавон забонҳои хориҷиро меомӯзанд. Аз соли 2025 инҷониб, барои пӯшонидани хароҷоти имтиҳонҳои ҷавононе, ки дар имтиҳонҳои байналмилалӣ натиҷаҳои баланд ба даст овардаанд, беш аз 3 миллиарду 90 миллион сӯм ҷудо карда шудааст. Зиёда аз 229 ҳазор нафар ҷавон тавассути барномаи мобилии «Ибрат фарзандлари» забонҳои хориҷиро онлайн меомӯзанд ва беш аз 31 ҳазор нафар ҷавон сертификат гирифтаанд. Дар доираи лоиҳаи «2+6», дар соли 2026 ба 2 ҳазор нафар ҷавон омӯзонидани забонҳои хориҷӣ ба нақша гирифта шудааст. Ин корҳо барои амалӣ кардани имкониятҳои ҷавонони вилояти Самарқанд, ташкили пурмазмуни вақти холии онҳо ва тарбияи насли баркамол хидмат мекунанд.

Дар идома оид ба роҳандозии лоиҳаи «Дафтари (офис)-и фронти ҷавонон» маълумот дода шуд. Бино ба маълумоти масъулон, лоиҳаи «Дафтари фронти ҷавонон» дар минтақаҳо марҳила ба марҳила бо мақсади дар байни ҷавонон ташаккул додани иммунитет бар зидди нашъамандӣ, баланд бардоштани огоҳӣ, фарҳанги ҳуқуқӣ ва тақвияти муҳити солими иҷтимоӣ амалӣ карда шудааст.

Зимни лоиҳа, дар аввал ҷараёнҳои интихоби ошкоро ва шаффоф дар ноҳияҳову шаҳрҳо ташкил ва ҷавонони фаъолу ташаббускори аз синни 14 то 30-сола, ки малакаи робита бо ҷомеа доранд, дар асоси мусоҳибаҳо интихоб карда шудаанд. Дар ҳар як минтақа гурӯҳҳои 10 нафарӣ ташкил ёфтаанд.

Дар байни дастаҳои ташкилшуда марҳилаи минтақавӣ баргузор гардидааст, ки дар он барномаҳои пешгирикунанда, ки аз ҷониби ҷавонон таҳия шудаанд, механизмҳои таблиғотӣ, ки дар маҳаллаҳо ва муассисаҳои таълимӣ амалӣ карда мешаванд ва пешниҳодҳо оид ба пешгирии таблиғоти ғайриқонунӣ дар фазои маҷозӣ баррасӣ шуданд. Дар натиҷаи ин марҳила, модели коре, ки ба ҳамкории системавӣ дар минтақаҳо асос ёфтааст, таъсис дода шудааст.

Дар анҷуман масъалаҳои бештар роҳандозӣ намудани лоиҳаҳои стартапӣ, миёни ҷавонон кам кардани ҷинояткорӣ ва самараи ба падархондӣ гирифтани онҳо низ баррасӣ гардиданд.

Ҳасан СУЛАЙМОНӢ